ភ្នំពេញ៖ រដ្ឋមន្ត្រីសាធារណការ ទេសរដ្ឋមន្ត្រី ស៊ុន ចាន់ថុល បានលើកឡើងថាគ្រោះថ្នាក់ចរាចរណ៍នៅកម្ពុជាក្នុងមួយថ្ងៃជាមធ្យមបានសម្លាប់មនុស្ស៥នាក់ ដែលស្នើនឹង១៥០នាក់ក្នុង១ខែ ខណៈធ្វើឱ្យខាតបង់ថវិកាជាតិប្រមាណ ៤៥០លានដុល្លារអាមេរិកក្នុងមួយឆ្នាំ។

ថ្លែងប្រាប់ក្នុងអ្នកសារព័ត៌មានបន្ទាប់ពីសម្ពោធដាក់ឱ្យប្រើប្រាស់មជ្ឈមណ្ឌលត្រួតពិនិត្យបច្ចេកទេសយានយន្តថ្មីមួយក្នុងខណ្ឌសែនសុខ រាជធានីភ្នំពេញ ព្រឹកថ្ងៃទី២០ ខែធ្នូ ឆ្នាំ២០២២ ទេសរដ្ឋមន្ត្រី ស៊ុន ចាន់ថុល ថាចំនួននេះគឺស្មើនឹងចំនួនមនុស្សមួយយន្តហោះបាត់ទៅហើយ ដែលជាក្ដីបារម្ភសម្រាប់សង្គមជាតិទាំងមូល។

លោកថា៖ «បើប្រៀបធៀបតួលេខទៅវាសាហាវណាស់! បើយើងនិយាយ៥នាក់ដូចតិចពេក និយាយថា១៥០នាក់ដូចពិបាកប្រៀបធៀប។ បើនិយាយថាកប៉ាល់ហោះមួយខែធ្លាក់មួយៗនៅកម្ពុជាវាច្រើនហួសហេតុហើយ អញ្ចឹងចូលរួមទាំងអស់គ្នាដើម្បីកាត់បន្ថយគ្រោះថ្នាក់ចរាចរណ៍»។

លោកទេសរដ្ឋមន្ត្រីបានស្នើដល់ពលរដ្ឋឱ្យចូលរួមគោរពច្បាប់ចរាចរណ៍ទាំងអស់គ្នា ជាពិសេសត្រួតត្រួតពិនិត្យបច្ចេកទេសយានយន្តជានិច្ចកុំធ្វេសប្រហែលដើម្បីការពារអាយុជីវិតរបស់ខ្លួន និងអ្នកដទៃនៅតាមដងផ្លូវ៕